ჯივზი, ვუსტერი და კიმი

გახსოვთ, დაახლოებით ერთი წლის წინ ჯივზთან ერთად რომ “დავიკიდეთ”? რა თქმა უნდა, გახსოვთ. ბერტი ვუსტერისა და მისი გამჭრიახი მსახურის დავიწყება ფრიად რთული საქმე გახლავთ. მოსიყვარულე დეიდა დალიასაც ვერ განდევნით ადვილად თქვენი მეხსიერებიდან. აბა დაფიქრდით – ირგვლივ მოგეძევებათ ისეთი დეიდა, რომელსაც ერთი სული აქვს, საკუთარი ძმისწული ავტობუსის ბორბლებქვეშ იხილოს? ჰოდა, ქალბატონი დალია ჯივზისა და ვუსტერის ახალ თავგადასავალშიც სრულიად განსხვავებულ როლს ასრულებს – მისი ჩანაფიქრი, არც მეტი, არც ნაკლები, ვუსტერთა გვარის ღირსებას შელახვით ემუქრება… ჯივზსაც რა დარჩენია – იძულებული ხდება, რომ ბერტი ვუსტერი ისევ იხსნას განსაცდელისა და თავის გასკდომისგან. ასეთი კამერდინერის პატივცემულ პატრონს ხომ არც ავბედითი სახლი აშინებს (უფრო არანორმალურებით დასახლებული ბალაგანი რომ ეთქმის) და არც დიდ ნერვიულობაში გადაზრილი ნაბახუსევი…

აი, კიმი კი სულ სხვა კაცია… ერთი შეხედვით, ჩვეულებრივი ინდოელი ბიჭია და ტიბეტელ ლამასთან დამეგობრებაზე მეტს რას უნდა ელოდოს ცხოვრებისგან, მაგრამ როდესაც მისი ირლანდიური წარმოშობა “წამოყოფს თავს”, ყველაფერი იცვლება და “ქვეყნიერების ძმაბიჭად” წოდებული კიმი კიმბოლ ო’ჰარად გარდაიქმნება… თითქოს აქ მაინც უნდა დასრულდეს მისი ისტორია, მაგრამ კიმს კიდევ გრძელი გზა აქვს გასავლელი – ჯაშუშის გზა ბრიტანულ-რუსულ დაპირისპირებაში… ამ ყველაფრის შემდეგ შეუძლებელია არ გაიზარდო… შეუძლებელია არ მიხვდე, რა გსურს…

P.S. თუ დაინტერესდით, ამ წიგნების თარგმანებს მარტივად მოიძიებთ. ორივე გამოცემა “დიოგენეს” ეკუთვნის. გია ჭუმბურიძისა და ზაზა ჭილაძის თარგმანებს რომ არაფერი დაეწუნებათ, კი გეცოდინებათ 🙂