თბილისის წიგნის მე-16 საერთაშორისო ფესტივალი

თბილისის წიგნის მე-16 საერთაშორისო ფესტივალი წელსაც ტრადიციულად საგამოფენო ცენტრ ექსპო-ჯორჯიაში გაიმართა, ანუ შეიძლება ითქვას, რომ წიგნები კიდევ ერთხელ მომადგნენ სახლის კართან 🙂 მართალია, ბევრი არაფერი მინდოდა, რადგან უკვე ქინდლიც მაქვს, “ბიბლუსიც” თითქმის ცხვირწინ გაგვიხსნეს (შარშანდელ ფესტივალზე მოცემული პირობა შესრულებულია) და “დიოგენეც” ხშირად გვანებივრებს ონლაინ-კონკურსებით, მაგრამ წიგნის საერთაშორისო დღიდან ფესტივალამდე გამოცხადებული მორატორიუმის გამო რამდენიმე სიახლე მაინც დაგროვდა და ჩვენც, როგორც ყოველთვის, კოლექტიურად გავუდექით გზას.

“ნადირობა” “ინტელექტის” სტენდიდან დავიწყეთ. შირინ ებადის “ოქროს გალია”, რომელსაც ასე ველოდი, კიდევ ერთხელ რომ გამომრჩენოდა, ვერ იქნებოდა კარგი ამბავი. ამიტომ სანამ საფულეც და მეხსიერებაც წესრიგში მქონდა, სასწრაფოდ გავაქანე ჩანთისკენ. აქვე მარკესის ოთხი ახალი თარგმანიც დაგვხვდა: “პოლკოვნიკს არავინ სწერს”, “გენერალი თავის ლაბირინთში”, “საზღვაო კატასტროფაში მოხვედრილი კაცის ნაამბობი ანუ ათი დღე ზვიგენების პირსპირ” და “ჩილეში არალეგალურად შეპარული მიგელ ლიტინის თავგადასავალი”. უკანასკნელი სამი ჩემთვის სიახლეა და სიამოვნებით გავეცნობი.

შემდეგი გაჩერება “ლოგოს პრესის” სულ პაწაწინა კუთხე გახლდათ. ნატო დავითაშვილის “ნისლებში და ნისლებს მიღმა” რატომღაც ფრიად დეფიციტური გახდა და რამდენიმე თვე უშედეგოდ ვეძებდი. სამწუხაროდ, ვერც ახლა მოვიძიე. ტირაჟი დამთავრდა, თუ რა ხდება, არ ვიცი, მაგრამ ჩემი ნომერ პირველი სურვილი კი იყო 😦

“სიესტამ” ოლდოს ჰაქსლის “საოცარი ახალი სამყარო” ისევ გამოსცა, “არტანუჯმა” კი ანა პოლიტკოვსკაიას “პუტინის რუსეთი” თარგმნა. ეს უკანასკნელი რამდენიმე თვის წინ წავიკითხე და გირჩევთ, რომ აუცილებლად შეიძინოთ.

“პალიტრა L” პოპულარობას არასდროს უჩიოდა და ახლაც სერიული გამოცემების შესავსებად მოსული მკითხველები მრავლად ირეოდნენ მათ სტენდთან. თუმცა მოგეხსენებათ, რომ ბოლო დროს გამომცემლობა გასცდა სერიებს და საკმაოდ საინტერესო გზას დაადგა. ამიტომ ამჯერად ორმაგად მეტი მკითხველი “მიესიათ” 🙂  ერთადერთი, რაც გამახსენდა, ის იყო, რომ დიდი ხანია ელიფ შაფაქის “სტამბოლელი ნაბიჭვრისა” და აკას “შენი თავგადასავლის” შეძენა მინდა. ამბობენ, სივენ კინგის “ნისლმა” ჩამოუსწრო ფესტივალსო, მაგრამ ვერ შევნიშნე. მეორე ვიზიტზე თუ უფრო სიხალვათე იქნა, მოვიძიებ 🙂

ხალხმრავლობით გამოირჩეოდა “ბაკურ სულაკაურის” სტენდიც. სამწუხაროდ, კინობიბლიოთეკაში დაანონსებული მხოლოდ ერთი წიგნი – სტანისლავ ლემის “სოლარისი” –  მოესწრო და ისიც უკვე წაკითხული მქონდა, მაგრამ რამდენიმე სიახლე მაინც დაგვახვედრეს. ამავე სერიის უკვე გამოსული წიგნების გარდა, სულ ახალი მურაკამი, რუშდი და აკა მორჩილაძის ორი წიგნი, რომელთაგან ჯერჯერობით ერთი – “ჩრდილი გზაზე” – “მოვინადირე”. კიდევ ჩეხოვმა და გეიმანმა ჩამოუსწრეს ფესტივალს. ეს უკანასკნელი არ წამიკითხავს და სიამოვნებით გავეცნობი. რაც შეეხება ფასდაკლებებს, ამჯერად მართლაც უპრეცენდენტო იყო და მარი ბექაურის “მეორე მხარე” და აკას თეთრი სერიის რამდენიმე ტომი საკმაოდ იაფად შევიძინეთ. თუმცა ისიც უნდა აღინიშნოს, რომ კატალოგში მითითებული ფასდაკლება ყოველთვის არ ემთხვეოდა რეალურს.

“დიოგენემ” არც ამჯერად უღალატა ტრადიციას და სერიოზულ ფასდაკლებებთან ერთად (თითქმის განახევრებული ფასი) სიახლეებიც შემოგვთავაზა. ჯერ იყო და ვუდი ალენი და ჯოის კეროლ ოუტსი მიემატნენ ამერიკელთა სერიას, შემდეგ ჯივზისა და ვუსტერის ახალი თავგადასავლები გამოჩნდა, დიდი ხნის წინ დაანონსებული “პრაღის სასაფლაოც” გამოვიდა (მე “ფუკოს ქანქარა” მერჩივნა, მაგრამ ისეთი ეგოისტიც არ ვარ, რომ ამ წიგნის გამოსვლა მწყენოდა) და “დიოგენეს ბიბლიოთეკასაც” შეემატა ახალი ტომი – ბოჰუმილ ჰრაბალის “ვემსახურებოდი ინგლისის მეფეს”. კიდევ ფამუქის “სხვა ფერებიც” ითარგმნა – თუ ესეები გიყვართ, მოგეწონებათ.

P.S. სიტყვა გამიგრძელდა. აჯობებს, თუ სასწრაფოდ ყველაზე მნიშვნელოვან ნაწილზე –  “დაგემოვნებაზე” – გადავალ 🙂 თქვენ კი, თუ ჯერ არ ყოფილხართ, არ გამოტოვოთ. წიგნები კვირის ჩათვლით გელიან 🙂 დახურვის დღეს მეც შევივლი კიდევ ერთხელ. “ბაკურ სულაკაურის სტენდთან” დათო ტურაშვილი აკა მორჩილაძის ახალ წიგნებზე ისაუბრებს.