“ექიმი ძილი” – დენი ტორანსის დაბრუნება

გახსოვთ დენი ტორანსი (ფილმი თუ არ გაქვთ ნანახი, წიგნის ქართული თარგმანი სულ ცოტა ხნის წინ გამოვიდა)? დიახ, ის “მანათობელი” ბიჭუნა, რომელიც ლამის საკუთარმა მამამ იმსხვერპლა, უფრო სწორად კი, სასტუმრო “ოვერლუკმა”… თურმე ნუ იტყვით და ზრდასრულობის ასაკში შესულ დენს მამამისივით სმა დაუწყია და ლოთობის მორევში ჩაძირულა. ვინ იცის, რა დაემართებოდა, რომ არა ერთი ძალიან საინტერესო ამბავი, რომელიც მის და ჩვენს ცხოვრებაში მოულოდნელად შემოიჭრა…

ჩვენი დენი “ექიმ ძილად” მუშაობდა (ალბათ გაინტერესებთ, ეს რას ნიშნავს, მაგრამ მოდით ინტრიგა შევინარჩუნოთ 😉 ), როდესაც კიდევ ერთი “მანათობელი” აღმოაჩინა – პატარა გოგონა, რომელიც თითქმის დაბადებიდან ახდენდა “უცნაურობებს”… და ტელეპატიურადაც დაუკავშირდა. თუმცა ეს ისტორია დიდად საინტერესო არ იქნებოდა, რომ არა სექტის მაგვარი უცნაური დაჯგუფება, რომელიც სწორედ “ნათების” მქონე ბავშვების სულებით იკვებებოდა… რა თქმა უნდა, მათაც მოისურვეს აბრას ახლოს გაცნობა (მსუბუქად რომ ვთქვათ) და სწორედ აქ დაიწყო ყველაზე საინტერესო – “დიდი რბოლა”… და წიგნიც უცებ შემომეკითხა. აბა, მიდი და დახურე, როდესაც შეიძლება ბოროტმა არსებებმა აბრა, მისი ოჯახი, დენი ან მათი მეგობრები იმსხვერპლონ… და უცებ წიგნის ფურცლებიდან წითელი ორთქლი რომ გადმოვიდეს, ან სარკეში რომ ჩაიხედოთ და ბუზები დაინახოთ??? 😉 არა, სჯობს ბოლომდე ჩახვიდეთ და გაიგოთ, რითი დასრულდება ყველაფერი. უფრო მშვიდად დაიძინებთ 😉

P.S. თუ კინგს აფასებთ და ეს წიგნი ჯერ არ წაგიკითავთ, აუცილებლად უნდა წაიკითხოთ. თან ხელმისაწვდომიცაა – სულ ახლახანს “პალიტრა L”-მა გამოსცა სერია “ჩემი რჩეული მსოფლიოს” ფარგლებში… მე კი წავალ და სანამ ნანატრი “გუმბათის ქვეშ” გამოვიდოდეს, “ჩონჩხების გუნდს” მივხედავ 🙂

Advertisements