ახალი წელი ტერი პრატჩეტთან ერთად

კიდევ ერთი წელიც მიიწურა. ყოველწლიურად უამრავი კარგი და ცუდი რამ ხდება, თუმცა აქ მხოლოდ ლიტერატურაზე ვსაუბრობთ და შესაბამისად ეს წელიც დადებითად შემიძლია შევაფასო. სხვანაირად არც შეიძლება – წელს ხომ ბევრი კარგი “მოგზაურობა” გამომივიდა 🙂

წლის ბოლო მოგზაურობა უკვე ერთგვარ ტრადიციად მექცა – ერთ-ერთი უკანასკნელი ავტორი უკვე რამდენიმე წელია სერ ტერი პრატჩეტი გახლავთ. გასაკვირი არც არის – თანამედროვეობაში მასზე მხიარული მწერალი არც მეგულება 🙂 ჰოდა, ამჯერადაც არ დავაყოვნე და დისკოს სამყაროსკენ გავემართე.

გახსოვთ ალბათ კუდიანებზე რომ ვისაუბრეთ. ჰოდა, ამჯერად ამ “ქვე-სერიის” დასაწყისი – “თანაბარი უფლებები” (თარგმანი ჩემია და შესაბამისად, ნაკლებად გამართული 🙂 ) – გამოვაძვრინე ქინდლის უკიდეგანო ბიბლიოთეკიდან და არც შევმცდარვარ. ძველი ნაცნობის – დიდებული კუდიანის ესმე Weatherwax-Ветровоски-ს (ამიერიდან ესმე დავუძახოთ, თორემ უნიჭო თარგმანი სერ ტერის შეურაცხყოფა იქნება 🙂 ) გარდა ჯადოქარ ესკარინა სმიტსაც შევხვდი. დიახ, დიახ, არ გეშლებათ – ესკარინა მდედრობითი სქესისა გახლავთ. ნუ იტყვით და თურმე დისკოს სამყაროშიც შეუღწევია გენდერულ თანასწორობას 🙂 წინასაახალწლოდ თავს აღარ შეგაწყენთ და აჯობებს, თჲ დანარჩენს თავად ნახავთ (თუ რუსულ თარგმანზე ან ორიგინალზე მიგიწვდებათ ხელი). მერწმუნეთ, კარგად გაერთობით 🙂

P.S. ახალ წელს გილოცავთ! ბევრ საინტერესო “მოგზაურობას” გისურვებთ. ხომ გახსოვთ – საუკეთესო საახალწლო საჩუქარი წიგნია და სადღესასწაულო დღეებში მათ დაგემოვნებაზე უკეთესს ვერაფერს გააკეთებთ… მე კი წლის უკანასკნელ წუთებს ისევ დელასა და ჯეიმსს მივუძღვნი – ტრადიცია ტრადიციაა 🙂

P.P.S. სულ ბოლოს წლის გამორჩეულ “მოგზაურობებს” გადავხედოთ:

• ნატო დავითაშვილის “ლურჯი სუფრის მოცეკვავე” და “პატარა დინოზავრი დინდინელა”
• ალექსანდრე სოლჟენიცინის “არქიპელაგი გულაგი”
• ანა პოლიტკოვსკაიას “პუტინის რუსეთი”
• სილვია პლათის “ზარხუფი”
• მარგარეტ ეტვუდის “მხევლის წიგნი”
• ჯოან როულინგის “ჰარი პოტერი და ფილოსოფიური ქვა” და “ჰარი პოტერი და აზკაბანის ტყვე”
• ანე-კატერინე ვესტლის “დედა, მამა, რვა ბავშვი და საბარგო მანქანა”
• ვლადიმირ სოროკინის “ოპრიჩნიკის დღე”