ისტორიის ლაბირინთებში აკუნინთან ერთად

ისტორია ბავშვობიდან მიყვარდა… ვერ ვიტყვი, რომ სკოლაში ჩემი საყვარელი საგანი იყო (როგორც თითქმის ყველა საგანი, ისეც ერთფეროვნად და “განმეორებადად” მეჩვენებოდა), თუმცა ინფორმაციის მიღება სასწავლო დაწესებულების მიღმაც ხომ შეიძლება (მგონი, ამ გზით ბევრად მეტი რამ შევიტყვე, ვიდრე “ტრადიციული” მეთოდით)… მაგალითად, ბორის აკუნინის მონათხრობიდან, რომელიც ხშირად გვეპატიჟება ხოლმე ისტორიის ლაბირინთებში, მათ შორის თავისი ბლოგის “გავლითაც”…

ბატონი ბორისის ჩანაწერების კრებული ზუსტად ისეთი წიგნების კატეგორიას მიეკუთვნება, “გემრიელად” რომ უნდა მოკალათდე და ერთი ამოსუნთქვით წაიკითხო. სანდო მეგზური არ გყავს თუ რა? აქეთ საფრანგეთის ისტორიული გმირები გიქნევენ ხელს, იქეთ – იაპონელები… და კიდევ ვინ მოსთვლის რამდენი საყოველთაოდ ცნობილი თუ მივიწყებული ადამიანი… ის გაფერხებთ, რომ ისტორია ჩემსავით არ გიყვართ? ნურც ამაზე იდარდებთ… აკუნინი ხომ ის კაცია, ყველანაირი გემოვნების მკითხველებისთვის რომ აქვს მომზადებული “დახვეწილი კერძი”… სულ ცოტა ნდობა და დიდად ისიამოვნებთ…

P.S. სამწუხაროა, რომ ჩვენი საყვარელი ბორისის ბლოგების (როგორც ბეჭდურად, ისე ონლაინ) წაკითხვის საშუალება მხოლოდ რუსულენოვან მკითხველებს გვაქვს. არადა, არ იქნებოდა ცუდი ერთი კარგი ქართული კრებულის გამოცემა 😉

Advertisements