ჰანიბალ ლექტერს ალბათ იცნობთ. მისი სახელის გაგონებისას თვალწინ ან ენტონი ჰოპკინსის სახე დაგიდგებათ, ან მეს მიკელსენისა (ძალიან იშვიათ შემთხვევებში შეიძლება გასპარ ულიელისაც)… და კიდევ სისხლი…ძალიან ბევრი სისხლი… აი ის კი შეიძლება არც იცოდეთ, რომ ეს ფრიად კოლორიტული და დაუვიწყარი პიროვნება ჯერ თომას ჰარისმა შექმნა და მხოლოდ შემდეგ იქცა კინომოყვარულთათვის საინტერესო გმირად.
პირველად ცნობილი ფსიქიატრისა და სერიული მკვლელის სახელი 1981 წელს გამოჩნდა წიგნში “წითელი დრაკონი”. მიუხედავად იმისა, რომ აქ და 1988 წელს გამოცემულ უფრო ცნობილ წიგნში “კრავთა დუმილი” მთავარი დამნაშავეებიცა და მათზე “მონადირეებიც” სულ სხვა პიროვნებები არიან, რეალურად თომას ჰარისი სწორედ ჰანიბალ ლექტერთან სტუმრობისკენ გვიბიძგებს. რომ არა დოქტორი ლექტერი, არ იარსებებდა არც ეს ორი წიგნი, არც 1999 და 2006 წლებში გამოსული გაგრძელებები (რომლებშიც ჰანიბალს მეტი ადგილი ეთმობა, თუმცა, ჩემი მოკრძალებული აზრით, პირველ ორ ნაწილს მნიშვნელოვნად ჩამოუვარდებიან) და არც ეკრანიზაციები (მათ შორის ცნობილი სერიალიც, რომელიც ზუსტად არ მიჰყვება პირველწყაროს, თუმცა ეს ნაკლზე მეტად ღირსება მგონია).
ჰანიბალ ლექტერის ფსიქოლოგია იმდენად საინტერესოა, რომ თამამად შეგვიძლია
მასთან “სტუმრობა” ფსიქიატრთათვის აუცილებლად მივიჩნიოთ. თუ “დრაკონისა” და “ბილის” ფსიქიკა სრულად იხსნება ჩვენს წინაშე, ექიმი-კანიბალის შინაგანი ბუნება ბოლომდე ამოუხსნელად რჩება. მას ვერც უილ გრემი (ზოგიერთ თარგმანში – გრეჰემი) უგებს ბოლომდე და ვერც კლარის სტარლინგი (თუმცა კი საპირისპირო ჰგონია). ვერც ჩვენ… “ჰანიბალი: აღზევება” თითქოს სწორედ იმიტომ დაიწერა, რომ ჰანიბალ ლექტერის “გაკანიბალების” საფუძველი საკუთარი თვალით გვენახა, “ჰანიბალი” კი მისი ზრდასრული (თავისუფალი) ცხოვრების ჩვენთვის ჩვენებაზე იყო ორიენტირებული, თუმცა ჰანიბალ ლექტერი ბოლომდე მაინც ვერ შევიცანით…
ჩვენ მხოლოდ ის შეგვიძლია, რომ ვესტუმროთ ჰანიბალ ლექტერს, მაქსიმალურად ახლოს გავიცნოთ და შემდეგ საკუთარ თავს დავაკვირდეთ – იქნებ უილის მსგავსად ჩვენც გვაქვს ბევრი საერთო მასთან? იქნებ კლარისივით ჩვენშიც ბღავიან კრავები?
P.S. ქართულად ჯერჯერობით მხოლოდ “კრავთა დუმილი” გვაქვს, თუმცა იმედია “ბაკურ სულაკაურის გამომცემლობა” ამაზე არ შეჩერდება და სერია “13”-ს სხვა ნაწილებითაც გაამდიდრებს.
კეჟერაძის ბლოგი 
ბოლო კომენტარები